Misaka ang kapasidad sa emergency response sa Dakbayan sa Dapitan human opisyal nga gidawat ug giturn-over ang 21 ka bag-ong Toyota Tamaraw Quick Response Vehicles atol sa pagsaulog sa ika-63 Charter Day sa siyudad.
Ang turnover ug blessing ceremony gipangulohan sa mga opisyal sa siyudad ug probinsya, lakip sila City Mayor Evelyn “Belen” T. Uy, Governor Darel Dexter T. Uy, Dipolog City Mayor Roberto Y. Uy Sr., ug Vice Mayor Gabriel M. Cad. Gipanalanginan usab ang mga sakyanan ni Rev. Msgr. Enrico Montaño sa wala pa kini opisyal nga i-deploy.
Kini nga 21 ka rescue units maoy donasyon sa Provincial Government of Zamboanga del Norte ubos sa pagpanguna ni Governor Darel Uy aron mapalig-on ang disaster response ug mapadali ang paghatod sa mga serbisyong pang-emergency sa lainlaing barangay sa Dapitan.
Matud pa sa City Government of Dapitan, ang bag-ong fleet kabahin sa padayon nga paningkamot sa administrasyon nga mapalambo ang kahandaan batok sa kalamidad, mapalig-on ang operasyon sa mga responders, ug mas mapaspas ang pagserbisyo sa katawhan.(IKEN B. GULLEM)
Source: Dapitan City Government