Usa ka 34-anyos nga babaye ang nadakpan sa mga operatiba sa Criminal Investigation and Detection Group (CIDG) Davao City Field Unit human gipasanginlang nagpaka-ahente sa Pag-IBIG Fund ug nangilad og dako nga kantidad sa kuwarta pinaagi sa giingong peke nga housing transactions.
Gihimo ang operasyon uban sa mga representante sa Pag-IBIG Fund Davao City sulod sa opisina sa ahensya sa Pryce Tower, J.P. Laurel Avenue, Bajada, Davao City, alas 1:57 sa hapon niadtong Hulyo 7, 2026.
Ang nadakpan giila sa alyas “Lyza,” 34 anyos ug residente sa Bangkal, Talomo, Davao City.
Sumala sa imbestigasyon, gipaila kuno sa suspek ang iyang kaugalingon isip awtorisadong ahente sa Pag-IBIG Fund ug nagtanyag og mga foreclosed properties o Real and Other Properties Acquired (ROPA). Gisaaran usab niini ang complainant nga mapaspasan ang pagproseso sa mga dokumento ug pag-apruba sa pagpalit sa mga kabtangan.
Tungod sa maong representasyon, mibayad ang complainant og kinatibuk-ang ₱1 milyon alang sa giingong pagpalit sa 16 ka housing units sa Deca Homes sa Talomo, usa ka unit sa Emily Homes sa Cabantian, ug usa pa sa Portville Subdivision sa Panacan.
Apan sa dihang gipaberipika sa complainant ang mga dokumento sa Pag-IBIG Fund, nadiskubre nga peke ang mga papeles ug wala diay opisyal nga koneksyon ang suspek sa maong ahensya. Dugang pa, nangayo pa kuno kini og ₱120,000 nga balanse, hinungdan nga midangop na ang biktima sa CIDG.
Misangpot kini sa operasyon nga nagresulta sa pagdakop sa suspek samtang nagproseso kuno og housing application ug nagdawat og kuwarta gikan sa complainant.
Nag-atubang karon ang nadakpan og mga kasong paglapas sa Republic Act No. 9485 (Anti-Red Tape Act of 2007), Article 177 sa Revised Penal Code alang sa Usurpation of Authority or Official Functions, ug Article 315 sa Revised Penal Code alang sa Estafa.(Camille Santos Naraga)(Source: DILG)