Gipasiugda ang usa ka Agri-Puhunan Orientation alang sa mga mag-uuma didto sa Demo Farm sa Barangay Olingan, niining dakbayan, Hulyo 10, 2025.
Ang maong kalihokan gipahigayon pinaagi sa Department of Agriculture – Agricultural Credit Policy Council (DA-ACPC), kauban ang National Irrigation Administration (NIA) ug ang Philippine Crop Insurance Corporation (PCIC), ubos sa AgriNegosyo Loan Program (ANYO-APP) Track 2 Facility.
Mitambong sa orientation sila si City Vice Mayor ug Acting City Mayor Senen O. Angeles, City Agriculturist Engr. Kerr N. Porlas, ug mga representante sa Rural Bank of Rizal, Kasangyangan Center for Community Development and Microfinance, Inc., ug Sindangan FOCOMA Consumers Marketing Multi-Purpose Cooperative.
Gipahigayon ang maong orientation aron hatagan og kasayuran ang mga mag-uuma kabahin sa proseso sa pag-aplay og pautang, mga kwalipikasyon, ug benepisyo sa programa, lakip na ang ubos nga interes sa financing, teknikal nga suporta, ug mas lapad nga access sa agricultural credit.
Gilauman nga pinaagi niini, mapalambo ang produksiyon sa mga mag-uuma ug mapakataas ang ilang kita pinaagi sa abot-kamay ug barato nga pinansyal nga tabang.
Gipasalig usab sa mga ahensya nga magpadayon sila sa pagpasiugda og susamang mga programa aron mas daghang mag-uuma ang makabenepisyo sa maong inisyatiba. (Jumalisa Papa)
Source: Dipolog City Government