Usa ka yano apan bililhon nga buhat sa pagkamatinud-anon sa mga estudyante sa Abellana National School, uban ang paspas nga aksyon sa Abellana Police Station, misangpot sa luwas nga pagbalik sa usa ka nalang pitaka nga adunay sulod nga ₱8,000 nga kwarta ug mga importanteng ID sa tag-iya niini.
Nakit-an sa mga Grade 7 nga estudyante gikan sa Section Zinnia nga sila si JM Libradilla, Loanah Daniela Bacu, Zhyreen Claire Mondejar, ug Janziel Maghanoy, ang maong pitaka nga nahulog sa Osmeña Boulevard. Sulod niini ang driver’s license, national ID, ug ₱8,000 nga cash. Dayon nilang gidala ug giturn-over kini sa Abellana Police Station nga walay paglangan.
Daling giaksyunan ni Police Master Sergeant Clark Emperado, PCR PNCO sa Abellana Police Station, ang pag-post sa nahisgutang pitaka sa opisyal nga Facebook page sa estasyon alas 1:30 sa hapon.
Sa dihang nakita ang post, midangop dayon si Romel Arceo Velayo, taga Barangay Pit-os, Cebu City ug usa ka drayber sa Cebu City Disaster Response Team, sa buhatan aron kuhaon ang iyang nalang pitaka.
Nagpasalamat si Velayo sa mga estudyante ug sa kapulisan, ilabi na kay ang kwarta sulod sa pitaka gitagana unta alang sa bayad sa ilang kuryente.
Gidayeg usab ang maong buhat ni PBGEN Redrico A. Maranan, Regional Director sa Police Regional Office 7 (PRO7), nga mipasidungog sa mga estudyante ug kapulisan sa ilang maayong pamatasan ug serbisyo sa komunidad.
Gipasabot usab niya ang kahinungdanon sa pagpalambo sa maayong pamatasan sa mga kabatan-onan ug sa panaghiusa sa kapulisan ug komunidad alang sa kalinaw ug kasigurohan.
Padayon ang panawagan sa PRO7 sa publiko nga sundon ang maong ehemplo sa pagkamatinud-anon ug suporta sa mga inisyatiba sa kapulisan alang sa mas luwas ug disiplinado nga komunidad.
Source: PRO7
| via Renante Socia Lada