Gipahigayon ang ikatulong hugna sa pay-out alang sa mga senior citizens sa syudad sa Dapitan City, didto sa Lobby sa Government Center, Hulyo 10, 2025.
Nadawat sa 119 ka senior citizens ang ilang ₱10,000 nga pinansyal nga ayuda — lakip ang 106 ka Octogenarians edad 80-anyos ngadto sa 89-anyos ug 13 ka Nonagenarians edad 90-anyos ngadto sa 99-anyos.
Ang maong programa gipasiugdahan sa City Government of Dapitan ubos sa liderato ni Mayor Evelyn T. Uy, pinaagi sa City Social Welfare and Development Office (CSWDO), kauban ang Office of the Senior Citizens Affairs (OSCA) ug ang National Commission on Senior Citizens – Regional Office 9 (NCSC-RO-9).
Sa ilawom sa maong inisyatiba, ang mga kwalipikadong senior citizens makadawat og ₱10,000 pesos, samtang ang mga centenarians o katong mga edad 100 pataas, ginahatagan og ₱100,000.
Mapasalamaton ang mga benepisyaryo sa nadawat nilang ayuda, nga ilang giila nga dako kaayong tabang alang sa ilang adlaw-adlaw nga panginahanglan ug personal nga kahimtang sa panglawas.
Padayon ang paningkamot sa lokal nga panggamhanan sa Dapitan sa pag-atiman ug pagpasidungog sa mga tigulang pinaagi sa mga programa nga nagpakita sa ilang pagmahal ug pagtagad alang sa katigulangan.(Jumalisa Papa)
Source: Dapitan City Government