Ang Agri-Aqua Commodity Promotions Exhibit ug Forum Mini Trade Fair nga gipangulohan sa Zamboanga-Basilan Development Alliance (ZABIDA) gipahigayon dinhi sa Dipolog, ning lalawigan.
Kini gitambungan sa nagkalain-laing ahensya sa gobyerno, local government units ug Small Micro-Medium Enterprises.
Sa pagbukas sa maong aktibidad, mainitong gihangop ni Department of Trade and Industry-9 Assistant Regional Director Ms Maridel Dengal ang mga partisipante sa maong exhibit ug ang suporta nga gihatag sa Provincial Government sa Zamboanga del Norte nga mipatunga niini nga aktibidad pinaagi sa Provincial Tourism Office. .
Matod ni Ms. Dengal, kini nga exhibit ug forum maoy pagpakita sa hiniusang paningkamot sa tanang stakeholders sa pagpasiugda sa mga lokal nga produkto sa probinsiya sa Zamboanga del Norte pinaagi sa mga exhibitors nga mipakita sa ilang mga produkto.
Gipasabot ni Ms. Esperanza Hupida, Project Coordinator sa ZABIDA-GIZ ang kamahinungdanon niini nga kalihokan ug ang dakong tahas niini sa pagpasiugda sa atong mga produkto, uban ang paghatag ug importansya sa kahusayan ug kalinaw sa pagkab-ot sa gitinguha nga kalamboan sa rehiyon.
Matod ni Ms Hupida, ang pagpatuman ug pagkompleto sa mga proyekto nga ipatuman mahitabo kung adunay kooperasyon ang tanan ug ang kalinaw mopatigbabaw sa usa ka lugar.
Sa iyang virtual nga mensahe isip pinasidunggang mamumulong ning maong panagtagbo, si Tourism Undersecretary Myra Paz Valderrosa-Abubakar, mipasalig sa hingpit nga suporta sa Department of Tourism niini nga kalihokan, uban ang pagpasalamat sa Provincial Government ni Gobernador Rosalina “Nanay Nene” Jalosjos sa suporta nga gihatag ngadto kang paghimo sa Agri-Aqua Commodity nga malampuson nga Mini Trade Fair Exhibition ug Forum.
(Source: Provincial Government of Zamboanga del Norte Facebook page)