Ya asegura si Tiniente General William Gonzales, el comandante del Western Mindanao Command (Westmincom), cay hay continua sila sustene de ila colaboracion con el policia para el seguridad del mga vivientes, especialmente este tiempo de Pascua.
Ese el cosa ya habla si Gonzales cuando ya visita canila na Campo Navarro si Brigadier General Bowenn Joey Masauding, el comandante del policia na region, del Martes aga.
“Un grande honor canamon el visitada del alto oficial del de amon pareja na mantencion de paz y orden na region,” ya habla si Gonzales.
Asegun con Gonzales, el visitada de Masauding es un gran lugar para ase de mafuerza el colaboracion y establisa buen coordinacion entre el militar y policia na Region 9.
Si Masauding ya expresa si gratitud con Gonzales y su personajes por el buen atencion ya dale conele durante su visitada na Campo Navarro. (B. Garcia, photo courtesy of Westmincom PIO)