Nagpadayon ang Katipunan Municipal Fire Station (MFS) sa pagpalig-on sa Adopt-A-Scholar Program pinaagi sa paghatag og suporta ug giya sa mga estudyanteng nanginahanglan og tabang sa Basagan Elementary School sa Barangay Basagan.
Gipangulohan ni FINSP Richard A. Parame, Acting Municipal Fire Marshal, ang maong inisyatiba nga nagtumong sa pagtabang sa mga kabatan-ong adunay potensyal apan nag-atubang og kalisod sa pag-eskwela. Pinaagi sa programa, naghatag ang mga bombero og mentorship, academic guidance, ug moral support aron mapalambo ang pagtuon ug personal nga paglambo sa mga scholars.
Gawas sa akademikong tabang, naghatag usab ang programa og suporta panahon sa pinansyal nga kalisdanan, lakip ang study skills training ug career exploration activities aron maandam ang mga estudyante alang sa mas maayong kaugmaon.
Matud sa Katipunan MFS, ang Adopt-A-Scholar Program kabahin sa ilang padayon nga paningkamot sa paghatag dili lamang og proteksyon sa komunidad kondili usab og oportunidad sa edukasyon alang sa kabatan-onan.(JENIFFER JR. DELICA)
Source: BFP R9 Katipunan Fire Station