Gikumpirma sa mga tigpasiugdang sa Kinabayo Festival 2026 nga moabot sa ₱1 milyon ang garantiya nga papremyo alang sa Street Dancing Competition nga ipahigayon karong Hulyo 25, nga gilauman magtapok sa mga contingents gikan sa nagkalain-laing lugar aron magpasundayag sa talento, kultura ug pagkamamugnaon.
Dunay nagkalain-laing kategorya sa kompetisyon lakip ang Best Contingent para sa Invitational ug Dapitan-Based categories, ingon man mga espesyal nga awards alang sa Festival Queen, Costume, Choreography, Musicality ug Sr. Santiago Mascot.
Gilauman nga mahimong usa na usab kini sa kinadak-ang atraksyon sa pista diin mapasundayag ang adunahang kultura ug tradisyon sa Dakbayan sa Dapitan pinaagi sa mabulokon ug dinamikong mga street performances.
Ang maong kalihokan kabahin sa pagsaulog sa Kinabayo Festival, usa sa labing iladong kasaulogan sa syudad nga nagpasidungog kang Señor Santiago ug nagpalig-on sa lokal nga turismo, kultura ug panaghiusa sa komunidad.(JENIFFER JR. DELICA)
Source: City Government of Dapitan