Hingpit nang natapos sa Department of Public Works and Highways (DPWH) Zamboanga del Norte 1st District Engineering Office ang pagpalambo sa access road padulong sa Maniway Peaks sa lungsod sa Rizal, Zamboanga del Norte ubos sa Tourism Road Infrastructure Program (TRIP).
Pinaagi sa maong proyekto, mas sayon ug mas luwas na karon ang pagbiyahe sa mga residente, motorista, ug turista nga moadto sa Maniway Peaks nga nailhan isip usa sa nag-uswag nga eco-tourism destinations sa munisipyo tungod sa matahum nga kabukiran ug panoramic view niini.
Gilauman usab nga makatabang ang mas maayong koneksyon sa dalan aron mosaka ang turismo sa lugar ug makahatag og dugang oportunidad sa panginabuhian sa mga residente pinaagi sa tourism-related services ug community-based enterprises.
Matud sa DPWH, kabahin kini sa ilang padayon nga paningkamot sa pagpalambo sa imprastraktura aron masuportahan ang kalamboan sa ekonomiya ug mas mapalig-on pa ang turismo sa Zamboanga del Norte.(IKEN B. GULLEM)
Source: DPWH REGION IX ZAMBOANGA PENINSULA