Padayon nga nagpasidungog ug nagmando sa labing taas nga pamantayan sa paghatag ug dekalidad nga lokal nga serbisyo panglawas ang Sergio Osmeña Sr. Infirmary Facility (SOSIF) human makab-ot ang 98% rating sa gihimong assessment sa Department of Health (DOH) ubos sa Integrated Hospital Operations and Management Program (IHOMP).
Ang maong ebalwasyon gimugna aron masiguro ang kalidad, kasaligan, ug episyenteng serbisyo medikal sa mga ospital ug infirmary sa nasud. Ang mataas nga puntos sa SOSIF nagpakita sa maayong operasyon, maampingong pag-atiman sa pasyente, ug pagtuman sa mga pamantayan sa DOH.
Sumala ni Dr. Arjay A. Lao, Team Leader sa pasilidad, dako ang iyang pagpasalamat sa panaghiusa ug dedikasyon sa tibuok SOSIF team.
Ang maong kalampusan nagpakita sa padayon nga suporta ni Governor Darel Dexter Uy alang sa mas lig-on ug integradong health system sa probinsya. Kini nagpalig-on usab sa pagsalig sa komunidad sa mga pampublikong pasilidad panglawas ug sa paningkamot nga mahatagan ang tanan ug dekalidad ug mapangga nga serbisyo medikal.(Iken B. Gullem)
Source: Zamboanga del Norte Provincial News Network