Isip pagpasidungog ug pag-ila sa mga lumad o katutubo nga maoy tinubdan sa kultura ug tradisyon, gisaulog sa lokal nga pangagamhanan sa Pres. Manuel A. Roxas Zamboanga del Norte ang Indigenous Peoples (IP) Month ug Indigenous People’s Rights Act Commemoration ubos sa temang “Weaving Culture, Enriching Future:Empowering Indigenous Communities as Bedrock of Sustainable Development”, nga gipahigayon sa Roxas Gymnasium.
Ang maong pagsaulog nagpasabot sa pag-ila sa dakong papel sa mga Katutubo, sa pagtipig sa kalibungan, yutang kabilin, ug espirituhanong pamatasan nga nagpalig-on sa pagkatawo ug pagkahiusa sa nasud.
Ang maong kalihokan gitambongan sa nagkalain laing barangay sa Roxas, sama sa Langatian, Denoman, Upper Irasan, Pangulogon,Piao, ug Tanayan. Samtang, mipakita usab suporta ang mga magtutudlo sa nagkalain lain nga mga tulunghaan, mga opisyales, ug ubang mga organisasyon.
Gibug-aton niini ang importansya sa pagpanalipod, pag-amuma, ug pagpalambo sa kultura sa mga Katutubo, tungod kay kini maoy ugat sa identidad, inspirasyon sa kalig-on, ug kalipay sa pagkatawo sa mga Pilipino. (Iken B. Gullem)
Source: Roxas ZamboNorte