Nibisita sa buhatan sa Mayor ning dakbayan sa Dipolog nga si Mayor Darel Dexter T. Uy , ang Commanding Officer sa 97th Infantry Battalion nga Lieutenant Colonel Jimmy J.Sanz, niadtong Hulyo 15, 2025, didto Mayor’s Office ning syudad sa Dipolog.
Ang maong pagbisita kabahin sa pagpalig-on sa panaghiusa ug kooperasyon tali sa lokal nga kagamhanan ug kasundalohan, maghisgot kabahin sa mga programa ug inisyatibo nga usa ka pagtinguha sa pagpadayon sa kalinaw ug seguridad sa siyudad, ilabi na sa mga barangay nga apektado sa hulga sa insurhensiya.
Si Lt. Col. Sanz nipasalig sa walay puas nga suporta sa 97th IB sa mga programa sa lokal nga gobyerno, ug ang ilang paningkamot nga mapadayon ang malinawon ug hapsay nga kahimtang sa syudad sa Dipolog ug sa tibuok lalawigan.
Kini nga panagtagbo gikalipay usab ni Mayor Uy ug nipaambit sa iyang pasalamat ngadto sa kasundalohan sa ilang suporta sa mga inisyatibo sa siyudad, ilabi na sa mga kalihokan nga nagtinguha sa kalinaw, seguridad, ug kalambuan sa komunidad.
Gilauman nga pinaagi sa padayon nga pakigtambayayong tali sa lokal nga gobyerno ug militar, mas mapalig-on pa ang mga programa alang sa katawhan ug masiguro ang malinawon nga pagpuyo sa komunidad.(Jumalisa Papa)
Source: Dipolog City Government