Dungan nga gidala sa Barangay Sicayab Bucana ang programang “Benteng Bigas” ug batakang serbisyong panglawas, diin mikabat sa 925 ka pamilya ang direktang nakabenepisyo sa maong inisyatiba sa kagamhanan.
Sa maong aktibidad, 185 ka sako sa bugas ang giapod-apod pinaagi sa baligya nga tag-₱20 matag kilo, nga naghatag og hinungdanong tabang sa pagpagaan sa gasto sa pagkaon sa mga kabalayan.
Gipatuman ang programa pinaagi sa Kagamhanang Lokal sa Dapitan, City Agriculture Office ug City Treasurer’s Office, uban sa suporta sa Kagamhanang Probinsyal ug sa 1st District Congressional Office.
Dungan sa distribusyon sa barato nga bugas, ang City Health Office nagpahigayon usab og “YAKAP” registration aron mapalapad ang kahapsay ug kadali sa access sa serbisyong panglawas sa mga residente sa barangay.
Gipadayag sa mga nakabenepisyo ang ilang pasalamat sa paghatod mismo sa programa sa ilang komunidad, nga dako og natabang sa ilang adlaw-adlaw nga panginahanglan ug kahimtang sa panglawas.
Padayon usab nga gipalapdan sa LGU Dapitan ang maong inisyatiba aron mas daghang barangay ang maabot sa mga programang naghatag og direktang tabang sa katawhan.(IKEN B. GULLEM)
Source: City Government of Dapitan