Mas mapaduol na sa mga komunidad sa mag-uuma sa lubi ang serbisyong panglawas human mipirma og Memorandum of Agreement (MOA) ang Philippine Coconut Authority (PCA) ug Corazon Aquino Hospital niadtong Abril 27, 2026 sa City Mayor’s Office dinhi sa siyudad.
Kabahin ang kasabutan sa implementasyon sa PCA Health and Medical Program nga nagtumong sa paghatag og hospitalization ug medical assistance alang sa mga coconut farmers ug ilang mga pamilya.
Kini nga inisyatiba magpalig-on sa access sa healthcare pinaagi sa mobile health services, ilabi na sa mga layo ug kulang og pasilidad nga mga lugar. Gilauman nga kini makapamenos sa gasto ug kalisod sa pagpa-check up ug pagpa-ospital sa mga benepisyaryo.
Ang maong programa giila nga dakong lakang sa paghatag og mas accessible ug inklusibong serbisyong medikal sa sektor sa agrikultura.
Sa laing bahin, mitambong sa MOA signing ang mga opisyal sa PCA lakip si Regional Manager III Bihildis A. Quezon, Acting Division Chief I Elpedio A. Espiritu Jr., ug ubang personnel sa ahensya, uban usab ang City Legal Officer Atty. Goldie Love P. Gonzales ug City Agriculturist Engr. Kerr N. Porlas, nga nagpakita sa lig-on nga panagtinabangay sa pagpaayo sa kahimtang sa panglawas sa mga mag-uuma.(IKEN B. GULLEM)
Source: Dipolog City Government