Kapin sa P8.1 milyones nga kantidad sa ayuda ang gilugway sa kagamhanang probinsyal sa Zamboanga del Norte ngadto sa mga labaw’ng nanginahanglan pinaagi sa Assistance to Individuals in Crisis Situation (AICS) Program nga gipatuman sa Provincial Social Welfare and Development Office (PSWDO).
Gipadayag kini ni Governor Darel Dexter Uy atol sa iyang unang State of the Province Address (SOPA) niadtong Hunyo 1 sa Zamboanga del Norte Convention and Sports Center, diin iyang gihatagan og gibug-aton ang paghatag og serbisyo ug suporta sa mga labing nanginahanglan sa probinsya.
Sumala sa gobernador, kapin sa P6 milyones ang gilugway alang sa medical assistance nga nakabenepisyo sa 1,343 ka indibidwal. Dugang pa, kapin sa P1.7 milyones ang gihatag isip burial assistance ngadto sa 363 ka pamilya, samtang kapin sa P414,000 ang nahatag isip shelter assistance sa 75 ka indibidwal nga naapektuhan sa kalamidad ug emerhensiya.
Gawas sa AICS Program, nagpadayon usab ang PSWDO sa pagpatuman sa mga programa alang sa senior citizens, kabatan-onan, kababayen-an, solo parents, persons with disabilities (PWDs), ug uban pang sektor aron masiguro nga maabot sa serbisyo sa kagamhanan ang nagkalain-laing panginahanglan sa katawhan.
Gipasiugda usab ni Governor Uy ang papel sa One Stop Assistance Center (OSAC), nga natukod aron mapadali ug mapalawom ang paghatag og serbisyo sa publiko. Sukad sa pag-abli niini, nakaserbisyo na kini sa 2,634 ka pasyente nga nanginahanglan og medical assistance pinaagi sa koordinasyon sa mga partner agencies, hospital ug health centers.
Matud pa sa gobernador, ang pagpalig-on sa social services nagpabiling usa sa mga prayoridad sa iyang administrasyon ubos sa panawagang “Kuyog Ta sa Bag-ong ZaNorte.”(IKEN B. GULLEM)
Source: Zamboanga del Norte Provincial News Network