Gidawat ni Dipolog Mayor Roberto Y. Uy sa iyang opisina ang mga estudyante sa Dipolog Pilot Demonstration School (DPDS) nga nagdala og kadungganan sa dakbayan pinaagi sa ilang kadaugan sa National Schools Press Conference (NSPC) 2026 nga gipahigayon sa Ormoc City, Leyte.
Atol sa courtesy visit, gipaabot sa mga estudyante, kauban ang ilang mga coach ug opisyal sa eskwelahan, ang ilang pasalamat sa suporta nga gihatag sa Dakbayan sa Dipolog nga nakatabang sa ilang pag-apil ug kalampusan sa nasudnong kompetisyon.
Nasungkit sa DPDS ang ikaduhang sunod nga kampyonato sa Radio Scriptwriting and Broadcasting (Elementary English) pinaagi sa ilang pagdaog sa Best Radio Production. Nakab-ot usab ni Pearl Jezzel I. Ajo ang ikaduhang puwesto sa Best News Presenter, samtang si Rofritz Matthew D. Nery nakakuha sa ikatulong puwesto sa Best Technical Director.
Gidayeg ni Mayor Uy ang dedikasyon ug kahago sa mga estudyante ug ilang mga mentor sa pagpakita sa talento sa Dipolog sa nasudnong entablado. Isip pagpasidungog sa ilang nahimo, gihatagan usab sila og insentibo sa dakbayan ug gipasiguro ang padayon nga suporta sa mga programa nga nagpalambo sa edukasyon ug campus journalism.(IKEN B. GULLEM)
Source: Dipolog City Government