Usa ka mainitong pagdawat ang gipasundayag sa lungsod sa Dipolog alang sa mga delegado sa 69th Annual National Assembly of Diocesan Directors and Diocesan Mission Directors sa Pontifical Mission Societies (PMS), pinaagi sa usa ka welcome dinner nga gipahigayon sa Dipolog Boulevard niadtong Hulyo 30, 2025.
Ang maong panagtigom gipangulohan sa City Government of Dipolog, uban sa Provincial Government of Zamboanga del Norte, aron pasidunggan ang mga lider sa simbahan nga mipundok alang sa tulo ka adlaw nga nasodnong asembleya.
Gisalmotan kini sa mga pari ug mission directors gikan sa nagkadaiyang diosesis sa tibuok nasud, nga pinangulohan ni Rev. Msgr. Esteban Lo, LRMS, sa Pontifical Mission Societies. Ang programa misaulog sa panaghiusa, pag-ampo, ug paglaum alang sa kalig-on sa misyonaryo nga buluhaton sa Simbahan Katolika.
Sa ilang mensahe, si Dipolog City Mayor Roberto Y. Uy ug si Governor Darel Dexter T. Uy nga girepresenta ni Provincial Information Officer Rosemarie Miranda, mipadayag sa ilang dakong pasalamat ug kalipay nga ang Dipolog napili isip venue sa maong halangdong asembleya. Ilang giila kini nga usa ka “balaan nga grasya” nga nagtimaan sa dugang espiritwal nga panalangin sa siyudad ug sa tibuok probinsya.
Gipasidunggan usab nila Rev. Msgr. Lo, kauban nila Most Rev. Severo Caermare, D.D., ug Most Rev. Socrates Misiona, MSP, D.D., ang mga lokal nga lider pinaagi sa paghatag og token ug certificate of appreciation alang sa ilang walay puas nga suporta sa kalampusan sa nasodnong asembleya.
Ang maong asembleya gituyo aron mapaambit ang kasinatian ug estratehiya sa pagpalig-on sa misyonaryo nga panawagan sa Simbahan Katolika, ug sa pagpadayon sa pagserbisyo sa mga kabus ug marginalisadong sektor sa katilingban.(Jumalisa Papa)
Source: ZNPNN