Malampusong gipahigayon sa Department of Trade and Industry (DTI) ang 2025 ZAMPEN MSME Caravan, Hulyo 30, 2025 sa ikaduhang andana sa Museo Dipolog ning dakbayan.
Ang kalihokan gimugna pinaagi sa panaghiusa sa DTI ug Micro, Small and Medium Enterprise Development (MSMED) Council, uban sa pakigtambayayong sa Lokal nga Pangagamhanan sa Dakbayan sa Dipolog. Tumong niini ang paghatud og suporta ug pag-abli sa dugang oportunidad sa negosyo alang sa mga Micro, Small ug Medium Enterprises (MSMEs) sa rehiyon.
Gisugdan ang programa pinaagi sa Welcome Remarks ni City Councilor Roseller L. Barinaga, nga mirepresentar kang City Mayor Roberto Y. Uy, samtang si DTI Regional Director Al-Zamir I. Lipae maoy nagtunol sa Opening Message.
Gipresentar sa caravan ang lain-laing programa ug serbisyo sa DTI, lakip ang Islamic Banking, Halal Market Opportunities, ug Small Business Corporation (SBCORP) Money App, nga gihatagan og gibug-aton isip kabahin sa paningkamot sa pagpalambo sa MSME sector.
Mitambong usab sa kalihokan ang nag-unang mga personalidad ug representante sa sektor sa negosyo ug gobyerno, mao sila si DTI-ZDN Provincial Director, Ms. Estrella M. Roda, Regional Halal Focal Mr. Ar-Chadee A. Bahjin,
PSMEDC President Atty. Paulino G. Gudmalin, Dipolog Chamber of Commerce Inc. Chairman Atty. Jan Hendrick I. Vallecer,
Business Permits and Licensing Chief Ms. Viola A. Pino, uban pang mga partner agencies ug MSME stakeholders gikan sa lungsod ug rehiyon.
Gipahigayon usab atol sa maong caravan ang Business-to-Business (B2B) Matching ug One-Town-One-Product (OTOP) Hub Display, nga nagtumong sa pagpakita sa mga lokal nga produkto ug pagpalapad sa merkado ug koneksyon sa mga gagmay’ng negosyante.
Pinaagi sa maong inisyatibo, gilauman nga mas mapalig-on pa ang presensya ug kapasidad sa MSMEs sa Zamboanga Peninsula isip hinungdanon nga kabahin sa lokal nga kalamboan ug ekonomiya.(Jumalisa Papa)
Source: Dipolog City Government