Nakatabang sa pagpagaan sa kahimtang sa 69 ka benepisyaryo sa Dapitan City ang ayuda pinansyal nga ilang nadawat ubos sa Tulong Panghanapbuhay sa Ating Disadvantaged/Displaced Workers (TUPAD) program niadtong Hunyo 12 sa Government Center Lobby.
Matag benepisyaryo nakadawat og ₱6,210 isip bayad sa ilang nahuman nga 15 ka adlaw nga trabaho sa komunidad ilawom sa programa sa Department of Labor and Employment (DOLE).
Daghang mga nakadawat ang mipadayag sa ilang pagpasalamat tungod kay magamit nila ang maong kantidad alang sa pagkaon, edukasyon sa mga anak, ug uban pang nag-unang panginahanglan sa ilang pamilya.
Gipahigayon ang payout sa DOLE pinaagi ni Joan Jaranay sa pakigtambayayong sa Public Employment Service Office (PESO) nga gipangulohan ni Engr. Nonito Malacat.
Pinaagi sa TUPAD, nagpadayon ang paghatag og temporaryong panginabuhian ug dugang kita ngadto sa mga disadvantaged ug displaced workers, nga nakatabang sa pagpalig-on sa ilang pang-adlaw-adlaw nga panginabuhi ug pag-atubang sa mga hagit sa ekonomiya.(IKEN B. GULLEM)
Source: Dapitan City Government