Gikatakdang ipresentar ni Dipolog City Mayor Roberto Y. Uy ang mga nahimo sa iyang administrasyon ug mga plano alang sa padayon nga kalamboan sa dakbayan atol sa iyang State of the City Address (SOCA) 2026 karong Hunyo 16.
Pagahimoon ang maong kalihokan alas 2:00 sa hapon sa Zamboanga del Norte Convention and Sports Center isip kabahin sa Regular Session sa ika-18 nga Sangguniang Panglungsod.
Gilauman nga hisgutan sa mayor ang mga kalampusan sa lokal nga panggamhanan, mga kasamtangang proyekto ug programa, ingon man ang mga prayoridad nga lakang aron mapadayon ang pag-uswag sa Dipolog City ug mapalambo pa ang paghatag sa serbisyo publiko.
Matud sa City Government, magpadayon ang maong kalihokan bisan pa sa regional holiday nga gideklara alang sa pagsaulog sa usa ka Muslim holiday, ug nahuman na ang kadaghanan sa mga pagpangandam alang niini.
Giawhag ang mga residente, mga lider sa negosyo, kawani sa gobyerno, mga organisasyon ug uban pang sektor nga motambong sa maong okasyon aron mamahimong saksi sa taho ug mga plano alang sa umaabot sa Dipolog.
Gihangyo usab ang mga motambong nga magsul-ob og business o casual attire ug moabot og sayo aron malikayan ang kalangan sa rehistrasyon ug masiguro ang hapsay nga dagan sa programa.(IKEN B. GULLEM)
Source: Zamboanga del Norte Provincial News Network