Aron mapalambo ang kahibalo sa hustong pagluwas ug pag-atiman sa mga ihalas nga hayop, nagpahigayon og wildlife rescue demonstration ug training ang Department of Environment and Natural Resources (DENR) Region IX isip kabahin sa kalihokan sa 4th Pet Expo 2026.
Gipangunahan ang training sa DENR IX Regional Wildlife Rescue Center ubos sa liderato ni Nowe Rodriguez, sa pakigtambayayong sa DENR Provincial Environment and Natural Resources Office Zamboanga del Norte nga girepresentahan ni Muhammad Fazl-Ur-Rahman Werble, ug sa DENR Community Environment and Natural Resources Office A2.
Sa maong training, gipresentar ang lecture bahin sa hustong pamaagi sa wildlife rescue ug pagdumala sa mga ihalas nga hayop, lakip ang paghisgot sa mga balaod nga nagpanalipod sa wildlife sa nasud. Gisundan kini sa aktuwal nga demonstration ug hands-on activity aron personal nga matun-an sa mga partisipante ang husto nga teknik sa rescue operations.
Mitambong sa kalihokan ang mga personahe gikan sa City Environment and Natural Resources Office, City Disaster Risk Reduction and Management Office, ug City Veterinary Office, kauban ang mga wildlife enthusiasts ug uban pang mga bisita.
Tumong sa maong kalihokan ang pagpalig-on sa koordinasyon ug kahibalo sa komunidad sa pagresponde sa mga kaso nga may kalabotan sa wildlife rescue ug pagpanalipod sa mga ihalas nga hayop.(IKEN B. GULLEM)
Source: Dipolog ENRO