Gipahibalo sa City Government of Dapitan nga sugod Lunes, Marso 9, ipatuman niini ang 4-day work week scheme alang sa mga opisina sa city hall, subay sa giya sa Civil Service Commission.
Ubos sa bag-ong kahikayan, ang mga opisina sa lokal nga gobyerno sa Dapitan City mag-operate na lamang Lunes hangtod Huwebes, alas-7:00 sa buntag hangtod alas-6:00 sa gabii. Kini nga polisiya gibase sa Civil Service Commission Memorandum Circular No. 6, s. 2022 nga giusab pinaagi sa Civil Service Commission Memorandum Circular No. 1, s. 2025.
Sumala sa city government, magpadayon ang maong iskedyul hangtod adunay laing direktiba gikan sa Office of the President of the Philippines.
Bisan pa sa pag-usab sa work schedule, gipasalig sa lokal nga panggamhanan nga magpadayon gihapon ang frontline services aron dili maapektuhan ang mga transaksyon sa publiko. Ang mga opisina nga naghatag og essential ug vital services, sama sa serbisyong panglawas, kaluwasan sa publiko ug emergency response, magpabilin nga operational sa tanang oras.
Gihangyo usab sa city government ang mga residente nga iplano daan ang ilang mga transaksyon sa city hall sumala sa bag-ong oras sa trabaho.(IKEN B. GULLEM)
Source: City Government of Dapitan