Malampusong gipahigayon ang culmination activity sa 4th Mayor’s Cup Inter-Barangay Basketball Tournament niadtong Mayo 11 sa Zamboanga del Norte Convention and Sports Center sa Dipolog City.
Gitambongan kini sa mga manlalaro gikan sa nagkadaiyang barangay nga miapil sa Junior Division, Senior Division ug Veterans Division diin gipakita sa mga atleta ang ilang abilidad, disiplina ug sportsmanship sulod sa duwa.
Napuno sa kusog, panaghiusa ug camaraderie ang maong torneyo nga dili lamang kompetisyon sa basketball kundili usa usab ka paagi sa pagpalig-on sa panaghigalaay ug kooperasyon sa matag komunidad sa syudad.
Sumala sa City Government of Dipolog, padayon nilang suportahan ang mga kalihokang pang-sports aron mapalambo ang kabatan-onan ug madani ang katawhan sa himsog ug aktibong panginabuhi pinaagi sa sports.(JENIFFER JR. DELICA)
Source: Dipolog City Government