Nadakpan ang usa ka 49-anyos nga babaye nga wanted sa kasong estafa atol sa gihimong operasyon sa kapulisan sa Dipolog City Police Station (CPS) didto sa Barangay Olingan, ning dakbayan sa Dipolog niadtong nakalabay’ng adlaw.
Ang suspect residente sa Labason, Zamboanga del Norte, kinsa gisikop tungod sa kasong estafa ubos sa Revised Penal Code, diin adunay girekomendar nga piyansa nga nagkantidad og Php180,000.00.
Ang pagkasikop gihimo pinaagi sa bisa sa Warrant of Arrest nga gi-isyu sa Regional Trial Court (RTC), 9th Judicial Region, Dipolog City.
Sumala sa Dipolog CPS, ang maong pagdakop kabahin sa ilang padayon nga kampanya batok sa mga wanted persons sa rehiyon. Gipasabot usab nga ang operasyon gihimo uban sa koordinasyon sa lain-laing ahensya sa balaod aron masiguro ang hapsay ug malinawon nga pagdakop.
Ang dinakpan anaa na sa kostodiya Dipolog City Police Station alang sa tukmang disposisyon ug legal nga proseso.(Jumalisa Papa)
Source: Dipolog CPS