Malampusong gipahigayon ang 3rd Quarter Nationwide Simultaneous Earthquake Drill didto sa lungsod sa Sibuco, Zamboanga del Norte, niadtong Huwebes, Septeyembre 11, 2025.
Tumong sa maong kalihukan ang pagpalig-on sa kahibalo ug kaandam sa publiko kon adunay kalit nga kalamidad sama sa linog. Gipasiugdahan usab ang pagpraktis sa hinungdanong pamaagi nga “Drop, Cover, and Hold” aron maprotektahan ang kaugalingon sa panahon sa kusog nga pag-uyog sa yuta.
Aktibong misalmot ang mga personahe sa Bureau of Fire Protection (BFP) pinangulohan ni SFO4 Rey M. Timtim, uban sa Municipal Disaster Risk Reduction and Management Office (MDRRMO), kapulisan, nagkalain-laing ahensiya sa gobyerno, ug Culaguan Elementary School.
Matod sa BFP, mahinungdanon ang panaghiusa ug pagtinabangay sa tanang sektor aron mapalambo ang kapasidad sa pagtubag ug mapakunhuran ang risgo nga dala sa mga kalamidad.
Ang nasudnong simultaneous earthquake drill gituyo aron masiguro nga ang mga Pilipino adunay igong kaalam ug kahandam sa dihang adunay linog nga mahitabo.(Jumalisa Papa)
Source: BFP R9 SIBUCO MFS