Gihatagan og bag-ong kahigayunan sa kinabuhi ang 23 ka “Friends Rescued” human malampusong nakahuman sa technical skills training nga gipahigayon sa 97th Infantry “Kalasaglahi” Battalion (97IB) ug sa Technical Education and Skills Development Authority (TESDA) sa Zamboanga del Norte.
Nag-agi sa 15 ka semana ang mga participante nga intensive training sa Tile Setting ug Construction Painting NC II nga gipadagan sa TESDA Provincial Training Center sa Sindangan gikan Oktubre 22, 2025 hangtod Marso 13, 2026.
Sa ilang gradwasyon nga gipahigayon sa kampo sa 97IB sa Piñan, gihatagan sila og National Certificate II (NC II) isip pamatuod sa ilang kahibalo ug kahandurawan sa maong teknikal nga kahanas.
Sumala sa TESDA, ang programa gituyo aron matabangan ang mga Friends Rescued nga makabaton og praktikal nga kahanas alang sa panginabuhian, makadugang sa ilang kahigayonan sa trabaho, ug makabalik sa komunidad isip produktibong mga miyembro sa katilingban.
Samtang, gipasiugda usab ni Lt. Col. Jessie G. Bergonia, commanding officer sa 97IB, nga ang kolaborasyon tali sa militar ug mga ahensya sa gobyerno maoy dakong tabang sa reintegrasyon sa mga Friends Rescued, ilabina sa paghatag kanila og bag-ong direksyon ug panginabuhian aron magpuyo sa malinawon ug produktibong kinabuhi.(IKEN B. GULLEM)
Source: 97th Infantry “kalasaglahi” Battalion