Mokabat 40 ka partisipante ang gibansay sa legal nga paggamit ug husto nga pagdumala sa foreshore areas atol sa orientation nga gipahigayon sa Community Environment and Natural Resources Office (CENRO) Liloy, sa pakigtambayayong sa Local Government Unit (LGU) sa Liloy.
Gilangkuban ang mga partisipante sa mga tag-iya sa beach resorts, barangay officials, stakeholders ug mga representante sa nagkadaiyang ahensya sa gobyerno nga mitambong sa kalihokan nga gipahigayon sa Digital Training Center (DCT) Building, Campsite, Liloy.
Pinaagi sa maong pagbansay, gipalawom ang kahibalo sa mga partisipante bahin sa legal nga mga rekisitos, permit requirements ug mga polisiya nga may kalabotan sa paggamit ug pagdumala sa foreshore areas.
Gihisgutan usab ang DENR Administrative Order No. 2004-24 ug ang proseso sa pagkuha og Foreshore Lease Agreement (FLA), lakip ang mga isyu nga may kalabotan sa salvage zones ug mga kasamtangang estruktura sulod sa foreshore areas.
Gihatagan usab og higayon ang mga partisipante nga makapangutana ug makapangayo og klaripikasyon atol sa open forum.
Gilauman nga pinaagi sa maong pagbansay, mas mapalig-on ang kahibalo ug pagsunod sa mga stakeholder sa environmental laws ug mga regulasyon sa foreshore management alang sa responsable ug malungtarong pagpalambo sa baybayon sa Liloy.(IKEN B. GULLEM)
Source: DENR Zamboanga Peninsula