Gisulat sa CZADCT x JHIM FARM ang ilang ngalan sa kasaysayan isip unang kampeon sa 1st Kinabayo Open Basketball Tournament human mapildi ang mga kaatbang sa unom ka-team nga kompetisyon nga kabahin sa Kinabayo Festival 2026.
Gipakita sa kampyon ang lig-on nga chemistry, disiplina ug teamwork sa tibuok torneyo aron masungkit ang inaugural championship ug maangkon ang unang titulo sa kompetisyon.
Samtang, nakuha sa team gikan sa Valencia, Bukidnon ang first runner-up, samtang mipwesto isip second runner-up ang IAN R.
Misidlak usab si Gileant Delator isip Most Valuable Player (MVP) human manguna sa iyang team pinaagi sa makanunayon nga performance ug importanteng kontribusyon sa ilang kampanya padulong sa kampeonato.
Sa awarding ceremony, personal nga gihatag ni City Councilor Bienvenido Diniay ang mga tropeyo ug cash prizes sa mga mananaog.
Nahimong dakong bahin sa selebrasyon sa Kinabayo Festival 2026 ang torneyo, diin gitapok ang mga manlalaro aron mag-indigay, magpakita sa ilang talento ug magpalig-on sa panaghigalaay pinaagi sa basketball.(IKEN B. GULLEM)
Source: Dapitan City Government