Balhog sa prisohan homan masikop ang usa ka 40 anyos nga panday nga nag atubang sa kasong Grave oral defamation atol sa gikasa nga hiniusang manhunt operation sa Purok 3, Barangay Potol, Dapitan City, Zamboanga del Norte, mga alas 4:30 sa hapon niadtong Marso 5, 2026.
Ang maong dinakpan naila nga si alyas “Tersio”40 anyos, lalaki, minyo, panday, ug residente sa samang lugar.
Ang pagkasikop sa suspek gihimo pinaagi sa mga personahe sa Dapitan City Police Station (CPS), uban sa koordinasyon sa 1st Zamboanga del Norte Provincial Mobile Force Company (PMFC), 5th Special Operations Unit (SOU) Mabuhay SBC, ug 901st Regional Mobile Force Battalion 9 (RMFB9), sa bisa sa Warrant of Arrest tungod sa kasong Grave Oral Defamation nga gi-docket ubos sa Criminal Case No. 21044, nga gi-isyu ni Hon. Hilarion Jonathan Garcia Maagad, Presiding Judge sa Municipal Trial Court in Cities (MTCC), Ninth Judicial Region, Dapitan City, Zamboanga del Norte, nga gipetsahan Marso 4, 2026, nga adunay girekomendar nga piyansa nga Php 6,000.00 para sa iyang temporaryong kagawasan.
Ang dinakpan nga suspek gipahibalo sa hinungdan sa iyang pagkadakop ug mga katungod sa konstitusyon ug anaa na kini karon sa kustodiya sa Dapitan City Police Station alang sa hustong disposisyon.(MEDALYN U. BORJA)
Source: ZNPPO