Tumang kalipay ang gibati sa katawhan sa upat ka barangay sa lungsod sa Labason ning lalawigan sa Zamboanga del Norte tungod kay nahidangat sa ilang tugkaran ang Ayuda ni Nanay Nene Outreach Program nga gipahigayon sa Covered Court, Barangay Antonino sa maong lungsod, Pebrero 8.
Kini napahimuslan sa katawhan sa Barangay Antonino, Gil Sanchez, Imelda ug Lupoc.
Mismo si Governor Nanay Nene ang nagpadala sa nagkalain-laing serbisyo dinhi aron mapaabot kini sa katawhan sibo sa iyang panultihon, “Misyon Ko, Tinuod nga Serbisyo”.
Nasayran nga adunay 392 ka indibidwal ang nakapahimulos sa libreng konsulta ug nahatagan sa tambal, 121 usab ang naibtan sa ngipon. Ingon man, 2 ang natuli, 28 ang napailawum sa Urine Albumin Creatinine Ratio (UACR) Test pinaagi sa Provincial Health Office ug Mobile Clinic sa kagamhanang lokal sa Dapitan sa pagpangulo ni Mayor Seth Frederick “Bullet”Jalosjos.
Gawas niini, adunay 2,000 ka indibidwal sa upat ka barangay ang nakadawat usab ug tag 3 ka kilo nga bugas pinaagi sa Provincial Social Welfare and Development Office (PSWDO).
Nabibo usab ang 700 ka mga bata ug dagko nga molopyo sa nahisgutang mga barangay kinsa nakakaon sa lamian nga lugaw pinaagi sa PSWDO.
Gihimo usab ang konsulta legal pinaagi sa Provincial Legal Office diin nakapahimulos ang katawhan sa libreng legal services.
Ang maong kalihukan gitambungan ni 3rd District Board Member Conkee Buctuan kinsa mipadayag sa iyang kalipay nga nakauban niya ang katawhan sa maong lungsod.
Mipaambit usab sa iyang mensahe si Kanhi Provincial Administrator Wilberth “Gaw Jojo” Magallanes kinsa miingon nga padayon magkahiusa alang sa kausaban sa lungsod sa Labason.
Mitambong si Kanhi 3rd Congressman Cesar Jalosjos, anak niini nga si JJ, Kanhi Spokesperson ni Nanay Nene nga si Atty. Ivan Patrick Ang ug mga aktibong indibidwal nga nagpakabana sa kalambuan sa maong lungsod.(Angelica T. Obina)
SOURCE: 𝗣𝗜𝗖-𝗦𝗵𝗲𝗻𝗴 𝗝𝘂𝗺𝗮𝗹𝗼𝗻 𝗕𝗮𝗹𝗮