Pinaagi sa paningkamot ni 1st District Congressman Roberto “Pinpin” Uy, Jr. ug sa lig-on nga suporta ni Dapitan City Mayor Evelyn T. Uy, 166 ka benepisyaryo gikan sa nagkalain-laing barangay sa Dapitan ang nakadawat og ayuda ubos sa Tulong Panghanapbuhay sa Ating Disadvantaged/Displaced Workers (TUPAD) program sa Department of Labor and Employment (DOLE), nga gipahigayon sa Ground Floor sa Government Center ning syudad sa Dapitan niadtong Agosto 6, 2025.
Sa maong ihap, 132 ka benepisyaryo ang nakatapos na sa ilang orientation, samtang ang nahibiling 34 ka partisipante mitambong sa orientation session nga gilakip sa gihisgotang aktibidad.
Ang TUPAD usa ka pang-emergency nga programa sa DOLE nga nagtumong sa paghatag og temporaryong panginabuhian sa mga displaced, underemployed, ug seasonal workers. Pinaagi sa maong programa, gihatagan og higayon ang mga benepisyaryo nga makakuha og temporaryong kita aron masuportahan ang ilang inadlaw-adlaw nga panginahanglan.
Pagkahuman sa orientation, ang mga benepisyaryo magsugod sa ilang 10 ka adlaw nga trabaho ubos sa TUPAD program, nga maglangkob sa mga simple nga community service sama sa paglimpyo sa palibot, pagtanom, ug uban pang kalihokan sa komunidad.
Gipadayag sa mga benepisyaryo ang ilang kinasingkasing nga pagpasalamat kang Congressman Pinpin Uy, Mayor Belen Uy, ug sa DOLE, tungod sa ilang padayon nga suporta sa mga katawhang kabus ug dis-advantaged. Ilang giila ang maong programa isip dakong tabang sa pagbangon sa ilang panginabuhi ug sa pag-atubang sa kalisod.(Jumalisa Papa)
Source: Dapitan City Government