Opisyal nga gisugdan sa lokal nga pangagamhanan sa Labason ang selebrasyon sa ika-38th Araw ng Labason, kaniadtong Enero 20, 2026, uban sa usa ka madasigon nga opening program sa Labason Plaza, diin mitambong ang nagkadaiyang sektor lakip ang Zamboanga del Norte Electric Cooperative (ZANECO) – Liloy Area Services.
Ang maong presensya sa kooperatiba nagpamatuod sa ilang aktibong papel sa pagsuporta sa mga kalihukan sa komunidad ilabi na sa mga panahon nga taas ang panginahanglan sa kuryente.
Gipangulohan ni Engr. Ferdinand Caldusa ang delegasyon sa ZANECO Liloy LAS, nga mipakita sa ilang pakig-alyansa sa LGU Labason alang sa hapsay ug luwas nga selebrasyon. Matud sa ZANECO, andam silang mosiguro sa lig-on nga suplay sa kuryente atol sa tibuok semana sa mga kalihukan aron malikayan ang disgrasya ug mapadayon ang kalampusan sa pista.
Gilauman nga modani og daghang bisita ang Araw ng Labason nga maglakip sa cultural presentations, trade fair, ug lain-laing community activities.(IKEN B. GULLEM)
Source: Zaneco, Inc.