Gikasal ang 33 ka magtiayon sa “Twogether Forever” Mass Wedding nga gipahigayon sa City Government of Dipolog pinaagi sa Office of the City Civil Registrar niadtong Pebrero 13, 2026 sa Atrium Hall, Top Plaza Hotel, Dipolog City.
Nagserbisyo isip Solemnizing Officer si Roberto Y. Uy, samtang naghatag og mensahe si City Councilor Praxides P. Rubia ngadto sa mga bagong kasal. Gitambongan usab sa mga representante sa nagkalain-laing opisina sa syudad ug sa Philippine Statistics Authority ang maong kalihokan, uban sa mga ginikanan, paryente, ug higala sa mga magtiayon.
Ang maong mass wedding ginahimo matag Pebrero sukad 2010 sa administrasyon ni Evelyn T. Uy aron matabangan ang mga Dipolognon nga gustong magpakasal apan naapektuhan sa kakulang sa pinansyal nga kapasidad.
Human sa seremonya, nagkuha og hulagway ang mga bagong kasal uban sa mayor ug mga bisita isip handumanan, lakip ang libreng photo booth nga giandam sa LGU. Nagpasalamat ang mga magtiayon sa City Government sa pagtabang kanila sa pagpatuman sa ilang damgo nga mahimong legal nga magtiayon.(JENIFFER JR. DELICA)
Source: Dipolog City Government