Kabsan sa iyang hinulamang kinabuhi ang usa ka rider human magbangga ang usa ka sakyanan ug usa ka motorsiklo nga nag biyahe sa sukwahi nga direksyon, kaniadtong Disyembre 16, 2025 pasado alas 12:43 sa udto didto sa national highway sa barangay Kayok, Liloy, Zamboanga del Norte.
Ang mga nalambigit sa insidente giilang, 43 anyos, lalaki, kasado, way trabaho, residente sa brgy. Gulayon, Dipolog City, ug driver sa maong Mitsubishi Expander, color puti. Samtang ang nakabsan sa iyang kinabuhi, giilang, 33 anyos, lalaki, single, self-employed, ug taga Butuan City apan kasamtangang nagpuyo sa brgy. Baybay, Liloy, ZN, driver sa maong Yamaha Aerox 155, color matte gray/black.
Sumala sa report sa Liloy Municipal Police Station (MPS), ang sakyanan nagbiyahe gikan sa Dipolog City paingon sa Tampilisan, samtang ang motorsiklo gikan sa Barangay Baybay, Liloy padulong sa Salug.
Base sa inisyal nga imbestigasyon, giingon nga ang drayber sa sakyanan nakatulog samtang nagmaneho, misulod sa pikas linya, ug didto nabangga ang motorsiklo. Tungod sa kakusog nga pagbangga, grabe ang samad nga naangkon sa drayber sa motorsiklo, nga daling gidala sa Liloy Integrated District Hospital sa MDRRMC personnel, apan gipahayag nga patay na pag-abot sa hospital.
Dugang pa, ang drayber ug mga pasahero sa sakyanan wala maangol sa insidente, apan ang drayber sa MV gidala sa Liloy Municipal Police Station alang sa hustong disposisyon ug dugang nga imbestigasyon.(IKEN B. GULLEM)