Nagpagawas og public safety reminders ang Police Regional Office 7 (PRO7) ug Cebu City Police Office (CCPO) aron masiguro ang kalinaw ug kaluwasan sa katawhan atol sa Pasko ug Bag-ong Tuig 2026.
Gipahinumdoman ang publiko nga magmatngon sa panimalay kung mobiyahe. Siguruhon nga sirado ang mga bintana ug pultahan, tangtangon ang mga butang nga dali kawaton, ug kung aduna’y CCTV, siguraduhon nga naglihok kini. Mas maayo usab nga adunay silingan o caretaker nga mobantay sa balay.
Sa mga mobiyahe ug magdala og sakyanan, gidasig ang tanang drayber nga siguruhon ang kahimtangan sa ilang sakyanan sama sa preno, suga, ug ligid. Dili pagdrive kung kapoy o nahubog, ug likayan ang overspeeding aron malikayan ang aksidente.
Sa pagdekorasyon, gipahinumdoman ang publiko nga gamiton lamang ang DTI-approved nga Christmas lights ug dekorasyon. Likayi ang pag-overload sa extension ug siguruhon nga palongon ang suga kung dili gamiton aron malikayan ang sunog.
Gipahimangnoan usab ang katawhan sa paglikay sa pabuto. Dili mopalit og iligal nga pabuto, bantayan ang mga bata, ug kung posible, dili na lang mogamit og pabuto aron malikayan ang kadaot ug disgrasya.
Sa tanang emerhensiya, mahimong motawag sa 911 o sa mga hotline sa CCPO ug ubang police offices nga gilista sa pahibalo.
Giingon sa kapulisan nga andam sila 24/7 aron motabang ug manalipod sa katawhan. Tumong sa pahimangno nga ang tanan makasugat sa malinawon, luwas, ug malipayon nga Pasko ug Bag-ong Tuig.
Source: CCPO
I via Renante Socia Lada
#rpndykccebu
#675hzamband
#tandemexpress