Makabaton og temporaryong trabaho ang 326 ka benepisyaryo gikan sa 21 ka barangay sa Dakbayan sa Dipolog pinaagi sa Tulong Panghanapbuhay sa Ating Disadvantaged Workers o TUPAD Program.
Gipahigayon niadtong Hunyo 25 ang orientation alang sa mga benepisyaryo nga gipangunahan sa Department of Labor and Employment ug Provincial Government pinaagi sa Public Employment Service Office o PESO.
Sumala sa DOLE, matag benepisyaryo makadawat og P464 matag adlaw sulod sa 20 ka adlaw nga trabaho, nga adunay kinatibuk-ang kita nga P9,280 matag usa.
Magsugod ang ilang deployment sa Hulyo 6 sa mga pampublikong eskwelahan sa Dipolog isip suporta sa Brigada Eskwela, diin ilang buluhaton ang paglimpyo, pagmintinar ug gagmayng pag-ayo sa mga pasilidad sa tulunghaan.(JENIFFER JR. DELICA)
Source: Zamboanga del Norte Provincial News Network