Sikop ang usa ka 32 anyos nga Street Level Individual (SLI)atol sa gihimo nga drug buy-bust operation sa mga tinugyanan sa balaod mga alas 2:00 ang takna sa kaadlawon sa Disyembre 22, 2025, didto sa Purok 5, Barangay Fatima, Liloy, Zamboanga del Norte.
Naila ang dinakpan nga drug suspek nga usa ka 32 anyos nga lalaki, ulitawo, trabahante, ug residente sa Barangay Lamao, Liloy, Zamboanga del Norte.
Ang pagkasikop sa suspek gihimo pinaagi sa Municipal Police Station Municipal Drug Enforcement Team (MDET) isip lead unit, uban sa koordinasyon sa Regional Drug Enforcement Unit 9 (RDEU9).
Atol sa operasyon nakumpiska sa otoridad gikan sa suspek mao ang usa ka gamay nga heat-sealed transparent plastic sachet nga adunay sulod nga puti nga kristal nga substansiya nga gituohang methamphetamine hydrochloride o shabu nga gigamit isip buy-bust item,duha ka gagmay nga heat-sealed transparent plastic sachet nga adunay sulod nga parehas nga substansiya nga nakuha isip mga butang nga gipanag-iya, usa ka Php 500 nga gigamit isip marked buy-bust money, ug usa ka walay sulod nga pula nga pakete sa sigarilyo nga New Berlin brand nga gigamit isip sudlanan.
Ang nakumpiska nga ilegal nga droga adunay kinatibuk-ang gibug-aton nga gibana-bana nga 2 gramos nga adunay gibanabana nga kantidad nga mobalor sa Php 13,600.00.
Ang dinakpan gipahibalo sa hinungdan sa iyang pagkadakop ug mga katungod sa konstitusyon ug gidala sa Liloy District Hospital alang sa medikal ug pisikal nga eksaminasyon.
Samtang ang nakumpiska nga mga butang sa droga gidala ngadto sa Zamboanga del Norte Forensic Unit, Liloy Field Office alang sa laboratory examination.
Ditenado na karon ang suspek sa kustodiya sa Liloy Municipal Police Station alang sa hustong disposisyon ug pagpasaka sa angay nga mga kaso.(MEDALYN U. BORJA)
Source: ZNPPO