Kinatibuk-ang 31 ka Friends Rescued nga sakop sa 97th Infantry “Kalasaglahi” Battalion ang opisyal nga nakadawat og Safe Conduct Pass (SCP) atol sa ceremonial issuance nga gihimo sa Plenary Hall sa Zamboanga del Norte Convention and Exhibition Center sa Pagadian City.
Ang paghatag sa SCP nagtimaan sa pagbag-ong pagsugod sa kinabuhi sa 31 ka indibidwal nga mipili sa dalan sa kalinaw ug panag-uli pinaagi sa National Amnesty Program.
Pinaagi sa SCP, gihatagan sila og legal nga panalipod ug kasiguruhan samtang ginaproseso ang ilang aplikasyon sa amnesty.
Ang kalihokan gipangulohan sa Provincial Government of Zamboanga del Norte, inubanan sa 97IB, Zamboanga del Norte Police Provincial Office, ug sa National Amnesty Commission pinaagi sa Local Amnesty Board. Personal nga mitambong ug mipasiugda sa kahinungdanon sa programa sila Governor Darel Dexter T. Uy ug BGen Samuel G. Yunque, kauban ang ubang opisyal sa gobyerno ug security sector.
Gipakita sa kalihokan nga ang 31 ka benepisyaryo dili lamang estadistika kundili mga buhing ehemplo sa kalinaw nga posible pinaagi sa panaghiusa sa gobyerno ug komunidad. Ang ilang desisyon sa pagbalik sa sabakan sa balaod usa ka dakong lakang padulong sa malungtarong kalinaw ug kahusay sa Zamboanga del Norte.(IKEN B. GULLEM)
Source: 97th Infantry “Kalasaglahi” Batallion