Mukabat sa 30 ka pamilya nga biktima sa nahitabong sunog sa Purok Tonggo, Brgy. Minaog Dipolog City, ang malampusong natunolan ug hinabang gikan sa buhatan sa Gobernador ning probinsya sa Zambonga del Norte pinaagi sa pagpanguna ni Gov. Darel Dexter T. Uy uban sa kapikas niini nga si Mrs. Vanny Uy niadtong nakalabay nga Marso 6,2026.
Ang maong pagtunol sa hinabang napahigayon human sa gihimong assessment sa mga kawani sa Provincial Social Welfare and Development (PSWDO).
Ang nasangpit nga mga hinabang gilangkuban sa cash assistance nga tag P5000 ka pesos, food packs, water jars, tsinelas ug tshirts alang ngadto sa mga kabataan nga gikalipay pag ayo sa mga residente nga naapektohan sa sunog.
Nunot niining paghatag sa mga hinabang ang pagdalit ug dili lang kalipay kundili apil usab ang kasakit subay sa panultihong padayun nga gisubay sa Gobernador ning probinsya nga mao ang “Kuyog ta sa Bag-ong Zanorte” .(MEDALYN U. BORJA)
Source: PSWDO ZDN