Nahimong usa sa mga mahinungdanong kalihokan sa pagsaulog sa ika-59 nga Araw ng Roxas ang blessing ug turnover sa 17 ka Toyota Light Ace Utility Vehicles ngadto sa mga benepisyaryong barangay, isip kabahin sa P1-milyon nga financial assistance nga gihatag sa Provincial Government sa Zamboanga del Norte.
Gipangulohan nila Mayor Ismael Rengquijo Jr. ug Vice Mayor Jun Yebes ang maong turnover, diin gipasidunggan ang mga barangay nga mipili sa pagpalit og utility vehicles aron mapalambo ang paghatag og serbisyo publiko ug mapadali ang transportasyon sa mga residente ilabina panahon sa emerhensya ug opisyal nga kalihokan.
Gawas sa mga sakyanan, adunay upat ka barangay nga migamit sa ilang pondo alang sa road concreting projects, samtang ang Barangay Dohinob mipili sa pagtukod og economic building nga adunay mga stalls aron makahatag og dugang panginabuhian ug kita sa komunidad.
Kini nga malampusong turnover nagpakita sa epektibong paggamit sa financial assistance nga gihatag sa Provincial Government ubos sa liderato ni Gov. Darel Uy, diin gitugotan ang matag barangay sa pagpili sa proyekto nga labing makatubag sa ilang panginahanglan.(IKEN B. GULLEM)
Source: RoNey PaCilan Tv