Mokabat sa 24 ka bata nga adunay nagkalain-laing nutritional concerns ang naka-avail sa medical ug dental check-up nga gipahigayon sa City Health Office (CHO) niadtong Agosto 25, 2026, sa City Health Office, Dipolog City.
Ang mga batang benepisyaryo giila nga adunay severely acute malnutrition (SAM), moderately acute malnutrition (MAM), underweight, ug overweight, nga maoy gipailalom sa health assessment aron mamonitor ang ilang kahimtang ug matubag dayon ang mga panginahanglanon sa ilang panglawas.
Pinaagi sa medical check-up, gisusi ang kinatibuk-ang kahimtang sa mga bata aron mahatagan sila og tukmang intervention ug pag-atiman kon gikinahanglan. Gilakip usab sa kalihokan ang dental examination aron masiguro nga apil sa regular nga pag-monitor ang ilang oral health.
Gipangulohan ang kalihokan ni Dr. Jorge Michael H. Buletic, Department of Health Doctor to the Barrios (DTTB); CHO Nurse Supervisor Donnabelle V. Mutia; CHO Nurse Assigned Coordinator ug Maternal, Newborn and Child Health Coordinator Marycris L. Torres; ug NDDP Nutritionist-Dietitian Lovely Ada.
Kabahin ang maong kalihokan sa padayong paningkamot sa CHO sa pag-monitor ug pag-atiman sa mga bata nga adunay nutritional concerns, uban ang tumong nga matubag sa hustong panahon ang ilang mga panginahanglanon sa panglawas ug nutrisyon.(IKEN B. GULLEM)
Source: Dipolog City Government