Nakab-ot sa Lokal nga Kagamhanan sa Munisipyo sa Leon B. Postigo ang pagka-finalist sa Circular Solutions: The Waste Diversion Challenge, isip pag-ila sa mga inisyatibo niini sa waste diversion, resource recovery, ug pagpalig-on sa solid waste management.
Gihatagan og Plaque of Recognition ang LGU Leon B. Postigo atol sa EPR Environmental Summit + Investment Forum 2026, nga adunay tema nga “Closing the Loop: Strengthening Solid Waste Management through Innovation and Partnership.”
Ang maong pagkahimong finalist nagpakita sa padayon nga paningkamot sa munisipyo sa pagpatuman sa mga pamaagi sa responsableng pagdumala sa basura, subay sa Republic Act No. 9003 o Ecological Solid Waste Management Act of 2000 ug Republic Act No. 11898 o Extended Producer Responsibility (EPR) Act.
Gipasiugda usab sa kalampusan ang papel sa LGU sa pagpasiugda sa resource recovery ug waste diversion isip kabahin sa pagpalambo sa usa ka mas circular ug malungtarong lokal nga ekonomiya.
Gipadayag sa LGU ang pagpasalamat sa EU-PH Green Economy Partnership ug kang Regional Director Atty. Abbas I. Lao alang sa pag-ila sa mga paningkamot sa munisipyo.
Giila usab ang kontribusyon sa mga municipal officials ug staff, garbage collectors, Material Recovery Facility (MRF) personnel, TUPAD-MAWAL workers, ug AVP team nga mitampo sa pagpatuman sa mga programa sa solid waste management.
Ang maong pag-ila nagsilbing dugang nga inspirasyon alang sa LGU Leon B. Postigo sa pagpadayon sa mga inisyatibo nga nagtumong sa mas episyente nga waste diversion, environmental sustainability, ug mas lig-on nga pakigtambayayong alang sa usa ka mas limpyo ug mas lunhaw nga komunidad.(IKEN B. GULLEM)
Source: SerbisyoGugma ni Mayor BobbyJam Jamora