Angol ang usa ka babaye homan kini giunay sa pagligis sa iyang ka live-in partner atol sa nahitabong mainit nga panaglalis mga alas 11:40 sa gabii niadtong Hunyo 24, 2026 didto Barangay Langatian, President Manuel A. Roxas, Zamboanga del Norte.
Naila ang biktima nga babaye nga 25 anyos, samtang ang suspek naila nga usa ka 27 anyos kinsa gi-alegar nga maoy miligis sa iyang live-in partner gamit ang motorsiklo atol sa mainit nga panaglalis, nga miresulta sa angol sa buolbuol ug bukton sa biktima.
Subay sa report, ang mga personahe sa Roxas Municipal Police Station daling miresponde sa nahitabong insidente ug dayon mihimo og follow-up operation nga misangpot sa pagkasikop sa nasangpit nga suspek.
Ang dinakpan nga suspek mag atubang karon sa kasong paglapas sa Republic Act No. 9262 (Anti-Violence Against Women and Their Children Act of 2004).
Gipahibalo ang dinakpan sa iyang mga katungod sa konstitusyon ug gidala sa Roxas Municipal Police Station alang sa hustong disposisyon, samtang ang duha ka partido gipailalom sa medical examination sa Rural Health Unit.(MEDALYN U. BORJA)
Source: ZNPPO