Himas Rehas sa prisohan ang duha ka Indibidwal nga Kolektor sa Iligal nga Sugal nga mas naila sa tawag nga Swertres kon Wirik-Wirik, pinaagi sa managlahing Police Operation sa mga Personahe sa Dapitan City Police Station, didto sa Barangay Liyang ug sa Barangay Opao nga parehong sakop sa Dakbayan sa Dapitan, niadtong nakalabay’ng adlaw, Hulyo 5 ug 6, ning Tuig 2025.
Ang duroha ka mga dinakpan giila sa Dapitan Pnp sa Alyas nga Weng-Weng ug Dansoy nga parehong mga Lalaki ug pareho usab nga ana na sa hingkod ang pangidaron, diin si Alyas Weng-Weng Lumolupyo sa Barangay Liyang, samtang si Alyas Dansoy, Residente sa Barangay Opao.
Sa pahayag nga giluwatan sa Dapitan Pnp, nga atol sa ilang gipahigayon nga operasyon ilang naaktuhan ang nasangpit nga mga Suspetsado, nga Nangulekta og Kwarta isip Pusta sa nahisgutang Iligal nga Sugal, nga walay pagtugot gikan sa PCSO, maong matud pa, nga sa walay paglangan ila dayon kining gisikop. Nakuha sa mga Awtoridad gikan Kontrol ug Posisyon sa mga Suspetsado, ang nagkadaiyang Denominasyon sa kwarta, mga Tally Sheet’s ug Ballpen, nga maoy mga ebidensiya batok kanila sa pagsupak sa (RA 9287) kon Illegal Number Games.
Sa pagka karon ang mga dinakpan atua na ubos sa Kustodiya sa Dapitan City Police Station alang sa pormal nga pag-atubang sa kaso nga gisang-at sa korte batok kanila.(Julius Esmade)
Source: DAPITAN CITY POLICE STATION