Nagpakita og tinuod nga panag-alagad sa komunidad ang 1st Zamboanga del Norte Provincial Mobile Force Company (1st ZNPMFC) human mitabang sa pagduso og usa ka sakyanan nga na-stall sa dalan aron mabalik kini sa luwas nga dapit.
Ang aksyon gipahigayon sa mga miyembro sa 4th Forward Operating Base (FOB) Platoon ubos sa pagdumala ni PLTCOL Ryan Jay R. Capurcos, Force Commander. Sa ilang inisyatibo, dali nilang gitabangan ang drayber nga naaberya, nga nakapugong sa posibleng disgrasya ug dugang nga trapiko sa maong lugar.
Sumala sa kapulisan, bisan gamay nga buhat, dako kini og kahulugan ilabi na sa mga tawo nga nanginahanglan og tabang sa dalan. Ang ilang lihok nagpakita nga ang ilang responsibilidad dili lamang kutob sa pagmintinar sa kalinaw ug kahusay, kundili apil usab ang paghatag og malasakit sa komunidad.
Gipasabot usab sa yunit nga ang maong panghitabo usa ka pananglitan sa ilang padayon nga paningkamot sa pagpalig-on sa pagsalig sa publiko pinaagi sa maayong buhat ug kooperasyon.(IKEN B. GULLEM)
Source: Zamboanga del Norte 1st Provincial Mobile Force Company