Gikan sa 192 ka manok nga unang gihatag isip puhunan, padayon nga mitubo ang poultry project sa Dansullan Multi-Purpose Cooperative sa Barangay Dansullan, Polanco, Zamboanga del Norte, nga gitumong sa paghatag og dugang panginabuhian sa mga benepisyaryo sa agrarian reform.
Nasuta ang kahimtang sa proyekto atol sa gipahigayong Kumustahan Session sa Department of Agrarian Reform (DAR) Zamboanga del Norte uban sa mga stakeholders aron masubay ang kalamboan, mga hagit ug panginahanglan sa kooperatiba.
Walo ka bulan human nadawat ang 192 ka manok gikan sa Belgian Government ubos sa Enhanced Partnership Against Hunger and Poverty (EPAHP), nakadugang na ang kooperatiba og 45 ka manok ug nagpaabot pa og laing 45 ka ulo isip kabahin sa ilang pagpalapad sa Chicken Egg Production and Marketing Project.
Sumala kang Cooperative Manager Teofila B. Alaman, nakabenepisyo usab ang mga miyembro tungod kay makapalit sila og preskong itlog sa mas ubos nga presyo kumpara sa regular nga merkado, nga nakatabang sa ilang gasto sa panimalay ug nutrisyon.
Apan usa sa mga hagit nga giatubang sa poultry project mao ang kakulang sa kasaligan nga suplay sa tubig, nga mahimong makaapekto sa padayon nga operasyon sa ilang negosyo. Tungod niini, nangayo og tabang si Alaman sa barangay ug lokal nga panggamhanan aron masulbad ang problema.
Gipangulohan sa DAR Zamboanga del Norte ang Kumustahan Session isip kabahin sa padayong pag-monitor ug pagpalig-on sa mga agrarian reform projects, uban sa koordinasyon sa Program Beneficiaries Development Division ug DAR Municipal Office sa Polanco.(IKEN B. GULLEM)
Source: DAR Zamboanga del Norte Province