Mahimo nang mas luwas ug mas sayon ang pag-eskwela sa mga kabataan sa Barangay Pangulogon, President Manuel A. Roxas, Zamboanga del Norte, human gitukod ug opisyal nga gitugyan ang ₱5 milyon nga hanging footbridge alang sa komunidad.
Kaniadto, suba ang kinahanglan tabokon sa mga estudyante aron makaabot sa Pangulogon Elementary School. Apan pinaagi sa bag-ong footbridge, gihatagan sila og mas kasaligan nga agianan padulong sa ilang eskwelahan.
Opisyal nga giturn-over ni Congw. Irene “Ate Ai” Labadlabad ang proyekto ngadto sa mga residente sa barangay, uban sa pag-apil ni Board Member Dante Bagarinao isip representante sa Provincial Government.
Mitambong usab sa kalihokan ang mga municipal official nga gipangulohan ni Mayor Ismael Renquijo ug mga barangay official ubos sa pagpangulo ni Punong Barangay Juanito C. Bartonico, kinsa pormal nga midawat sa proyekto alang sa komunidad.
Malipayon usab nga mitimbaya ang mga magtutudlo ug estudyante sa Pangulogon Elementary School kang Ate Ai pinaagi sa ilang pagdala og mga flaglet isip timaan sa ilang pagpasalamat.
Dugang nga tabang ang nadawat sa mga estudyante human gipanghatagan usab sila og mga payong isip kabahin sa suporta alang sa mga batan-ong benepisyaryo.
Gilauman nga ang bag-ong hanging footbridge dili lamang mahimong luwas nga agianan, kundili usa usab ka tulay padulong sa mas sayon nga pagkat-on ug mas maayong kahigayonan alang sa mga kabataan sa Pangulogon.(IKEN B. GULLEM)
Source: Irene “Ate Ai” Labadlabad