Nagtigom ang 14 ka swimming teams gikan sa Visayas ug Mindanao sa Kinabayo 2026 Leg 1 Swimming Tournament – Philippine Aquatics Incorporated Region IX Short Course nga malampusong nahuman niadtong Hulyo 12 sa Jose Rizal Memorial State University sa Dakbayan sa Dapitan.
Gipahigayon ang duha ka adlawng kompetisyon gikan Hulyo 11 hangtod 12 diin gatusan ka mga manlalangoy ang mipakita sa ilang abilidad, disiplina ug sportsmanship isip kabahin sa mga kalihokan sa Kinabayo Festival 2026.
Giorganisar sa Philippine Aquatics Incorporated Region IX ang maong torneyo aron mahatagan og higayon ang mga batan-ong manlalangoy sa pagpalambo sa ilang talento, pagpalig-on sa ilang kompetitibong kahibalo ug pagpakig-uban sa ubang mga atleta gikan sa lain-laing rehiyon.
Gidayeg sa Dakbayan sa Dapitan ang tanang mga manlalangoy, coaches, ginikanan, opisyal ug mga organisador alang sa ilang suporta ug dedikasyon nga nakatampo sa kalampusan sa maong kompetisyon, nga usa sa mga nag-unang kalihokan sa Kinabayo Festival.(JENIFFER JR. DELICA)
Source: Dapitan City Government