Mokabat sa 132 ka mga residente gikan sa nagkalain-laing barangay sa lungsod sa Roxas ang miagi sa screening sa Zamboanga del Norte Medical Center isip lakang aron mahimong kwalipikado sa libreng operasyon ug ubang espesyal nga serbisyong medikal ubos sa 292nd Tzu Chi Medical Mission.
Gitumong ang screening sa pag-assess sa kahimtang sa matag pasyente aron matino kung unsang matang sa pagtambal o operasyon ang ilang angayng madawat sa medical mission nga ipahigayon sa Agosto 6 hangtod 8.
Pinaagi sa suporta sa Probinsyal nga Pangagamhanan sa Zamboanga del Norte, giasistihan ang mga pasyente sa ilang transportasyon ngadto sa ZNMC, samtang ang LGU Roxas ubos ni Mayor Ismael Rengquijo naghatag usab og sakyanan ug pagkaon alang sa mga partisipante ug ilang mga kauban.
Ang 292nd Tzu Chi Medical Mission maghatag og libreng serbisyo sa general medicine, pediatrics, OB-Gyne, dental, ENT, eye screening, ug pipila ka surgical procedures pinaagi sa panagtambayayong sa Tzu Chi Foundation Philippines, Provincial Government of Zamboanga del Norte, ug ubang mga kaabag.(IKEN B. GULLEM)
Source: Zamboanga del Norte Provincial News Network